നിയോഗം

എന്തിന്റെയോ വഴികാട്ടികളായി
മരങ്ങൾ
മേലേക്ക് ചൂണ്ടിനില്ക്കുന്നു,
വേരുകൾ
മണ്ണിന്റെ മറവിൽ
പാതാളം തേടുമ്പോഴും.


വിഭാഗം: കവിത

നിയതി

കാറ്റ് ചെവിയിൽ മൂളുമ്പോൾ
മുറ്റത്തെ മുക്കുറ്റിക്ക്‌
താളത്തിൽ തലയാട്ടാതെ വയ്യ

വെയിൽ ദയവോടെ തഴുകുമ്പോൾ
വിനീതനായ് വിളങ്ങി വണങ്ങാതെ വയ്യ

മഴ കനിവോടെ കഴുകുമ്പോൾ
പൊടിവെടിഞ്ഞ് ശുദ്ധമാവാതെ വയ്യ

കാറ്റും വെയിലും മഴയും കടക്കാത്തിടത്തിരുന്ന്
എനിക്കിതുകുത്തിക്കുറിക്കാതെ വയ്യ.

ഹൃസ്വലിപി

സന്ധ്യതൻ സിന്ദൂരത്തിൽ തുടുത്ത മുഖം കുനി-
ച്ചെന്തു,നീ വെണ്മണലിൽ കുറിച്ചു വിരൽത്തുമ്പാൽ?
അറിവീലെനിക്കു,നിൻ ഭാഷതൻ ഹ്രസ്വലിപി;
അറിവേൻ കണ്ണുകളിൽ തുടിക്കും പ്രേമോല്ലാസം.